Qəzza zolağına göndəriləcək humanitar yardımın həcmi gündəlik olaraq 500 yük maşınına çatdırılacaq.
Sitat.info xəbər verir ki, bu barədə ABŞ Dövlət Departamentinin Mətbuat xidmətinin rəhbəri Metyu Miller məlumat verib.
O, yardımın bu səviyyəyə çatdırılmasının bir gecədə mümkün olmadığını, lakin bu hədəfə doğru çalışdıqlarını bildirib. Miller humanitar yardımı artırmağın yollarını daha yaxşı bilən təşkilatlarla əməkdaşlıq etdiklərini vurğulayıb və atəşkəsdən sonra bu səylərin nəticə verəcəyinə əmin olduğunu əlavə edib.
Xatırladaq ki, Qəzza zolağında atəşkəs razılaşması əldə edilib. “Əl-Cəzirə” telekanalı razılaşmanın ilk mərhələsində 33 israilli girovun azad olunacağını və İsrail ordusunun Qəzza sərhədindən 700 metr geri çəkiləcəyini bildirib./ Musavat.com