Məlum olduğu kimi, Ermənistanın sərhəddə törətdiyi təxribat nəticəsində 50 nəfər hərbçimiz şəhid olub.
SİTAT.İNFO xəbər verir ki, Vətən uğrunda canından keçənlərdən biri də Lerikin Əlivə kəndindən olan Sadıxov Şəmistan Abdulağa oğludur.
Şəhidimizin cənazəsi dünən axşam saatlarında doğulduğu kəndə gətirilib, böyük izdihamla qarşılanıb, qonşu kəndlərdən, rayonlardan insanlar axın edib.
28 yaşlı Şəmistan ömrünün 7 ilini hərbidə, Sərhəd Qoşunlarında gizir kimi xidmət edib.
3 bacının yeganə qardaşı olan Şəmistan, bacılarını köçürəndən sonra evlənməyə qərar verib.
Elə 2 ay öncədə o, ailə həyatı qurub.
Bir həftə əvvəl isə həyat yoldaşı Lənkəran şəhərində əməliyyat olunubmuş. Buna görə də ona 5 günlük məzuniyyət verilib.
3 gün əvvəl Lənkərana gələrək yoldaşına xəstəxanada baş çəkib. Sonra kəndə evlərinə gəlib. Elə həmin gün, yəni iki gün əvvəl təcili onu geri çağırıblar.
Məhərrəmlik çatdığından ailə Şəmistanın heç toy kasetinə də baxmağa macal tapmayıb. (Bakupost.az)