Sanksiyalar Rusiyanın müharibəsini davam etdirmək imkanlarını zəiflətmək, resursları azaltmaq məqsədi daşıyır.
Amerika Birləşmiş Ştatları bu gün, fevralın 24-də Rusiyaya qarşı sanksiyaları genişləndirib.
Sanksiya siyahısına Rusiyanın 22 fiziki və 83 hüquqi şəxsi daxildir.
ABŞ Maliyyə Nazirliyinin məlumatına görə, sanksiyalar Rusiyanın Ukraynaya qarşı müharibəni davam etdirmək və bunun üçün lazım olan resursları əldə etmək imkanlarını azaltmaq məqsədi daşıyır. Məhdudiyyətlər, digər sahələrlə yanaşı, Rusiya iqtisadiyyatının metallurgiya və mədənçıxarma sektorlarını da əhatə edirdi.
"Rusiya sanksiyalardan və ixrac nəzarətindən yayınmağın yollarını axtarsa da, ABŞ hökuməti bütün dünyada bu cür yayınmalara qarşı mübarizəni gücləndirir. Bugünkü sanksiyalara Rusiyanın sanksiyalardan yayınmaq cəhdləri ilə əlaqəli olan 30-dan çox insan və üçüncü ölkələrdən şirkətlər daxildir. Qanunsuz silah alveri və qeyri-qanuni maliyyələşdirmə də buraya daxildir”, - ABŞ Maliyyə Nazirliyi bildirib.
Qeyd olunur ki, Rusiya bank sektorunun bütün aktivlərinin 80%-dən çoxunu təşkil edən Rusiya bankları artıq ABŞ və beynəlxalq sanksiyalar altındadır. Bu gün ABŞ Maliyyə Nazirliyinin Xarici Aktivlərə Nəzarət İdarəsi (OFAC) Rusiya Federasiyasının 10-dan çox maliyyə qurumunu, o cümlədən aktivlərinin dəyərinə görə on ən böyük bankdan birini sanksiya siyahısına əlavə edib.
Nərgiz,
Sitat.info