Rəcəb Tayyib Ərdoğanın yenidən prezident seçilməsindən sonra kabinetin nə vaxt açıqlanacağı maraq doğurur. Paytaxt Ankarada gözləntilər Ərdoğanın cümə günü and içdikdən sonra kabinetini açıqlayacağı yönündədir.
Sitat.info xəbər verir ki, Ərdoğan prezident seçkilərinin ikinci turunda lider olduqdan sonra diqqətlər yeni kabinetin formalaşdırılmasına yönəldilib. Prezident Ərdoğanın cümə günü and içəcəyi, kabinetini də elə həmin gün formalaşdıracağı gözlənilir.
Əldə edilən məlumata görə, prezident Rəcəb Tayyib Ərdoğanın cümə günü parlamentdə and içməsindən sonra geniştərkibli andiçmə mərasimi keçiriləcək. Prezident Kompleksinin bağında keçiriləcək mərasimdə xarici dövlətlərin dövlət və hökumət başçıları, beynəlxalq təşkilatların rəhbərləri və vətəndaşlar da daxil olmaqla 30 minə yaxın insan iştirak edəcək. Prezident Ərdoğan həmin gün kabinetini açıqlayacaq.
YENİ KABİNETDƏ KİMLƏR OLACAQ?
Ankaranın kulislərində prezident Rəcəb Tayyib Ərdoğanın kabinetini demək olar ki, tamamilə yeni adlardan formalaşdıracağı ilə bağlı xəbərlər yayılıb. Qaydalara görə AKP siyahılarından millət vəkili seçilə bilməyən adların kabinetə daxil ola biləcəyi düşünülür. Həmçinin kabinetdə tanınmış siyasi şəxsiyyətlərə malik adların da yer alacağı gözlənilir.
Bu arada, Xəzinə və Maliyyə nazirliklərinin ayrıla biləcəyi və Fəlakət Nazirliyinin yaradılması variantları arasındadır. Ərdoğanın iki vitse-prezident təyin edə biləcəyi də bildirilir. Millət vəkili seçilən nazirlərin AKP-nin qrup rəhbərliyində vəzifə alması gözlənilir.
Nərgiz,
Sitat.info