İsrail qüvvələrinin işğal altındakı İordan çayının qərb sahilində keçirdiyi basqınlarda 7 fələstinli yaralanıb, 12 nəfər saxlanılıb.
Sitat.info xəbər verir ki, İsrail qüvvələri İordan çayının qərb sahilinin müxtəlif bölgələrinə, xüsusilə Yerixo və Cenin şəhərlərinə basqın edib.
Əsgərlər Yerixo şəhərindəki Aqaba Cabr qaçqın düşərgəsinə basqın edərək bir çox evdə axtarış aparıblar. Bu arada bölgə əhalisi ilə İsrail əsgərləri arasında qarşıdurma baş verib. İsrail qüvvələri fələstinlilərə rezinlə örtülmüş metal güllələr və gözyaşardıcı qaz, eləcə də həqiqi sursatla müdaxilə edib.
Fələstin Qızıl Aypara Cəmiyyətindən verilən açıqlamada Aqaba Cabrda canlı güllələrdən yaralanan 6 nəfərin ilkin tibbi yardımdan sonra müalicə olunmaq üçün Dövlət Xəstəxanasına aparıldığı bildirilib.
İsrail qüvvələri Cenin bölgəsinin Kefr Dan kəndinə təşkil etdiyi basqında bir fələstinlini də canlı güllələrlə yaralayıb. Basqın zamanı bir fələstinlinin avtomobilinin partladıldığı bildirilib.
Fələstin Əsirlər Dərnəyindən verilən yazılı açıqlamada İsrail qüvvələrinin işğal altındakı İordan çayının qərb sahilində keçirdiyi basqınlar zamanı Kefr Dan kəndində 4, Ramallahda 6, Kalkiyada 2 nəfəri nəzarətə götürdüyü bildirilib.
Seymur Bənnayev
Sitat.info