İranın xarici işlər naziri Hüseyn Əmir Abdullahiyan 7 ildən sonra Tehranla Ər-Riyad arasında münasibətlərin bərpasından sonra ilk dəfə Səudiyyə Ərəbistanına gedib.
Sitat.info xəbər verir ki, İranın rəsmi xəbər agentliyi İRNA-nın məlumatına görə, Abdullahiyan onu müşayiət edən yüksək səviyyəli nümayəndə heyəti ilə Səudiyyə Ərəbistanının paytaxtı Ər-Riyada getmək üçün Tehrandan ayrılıb.
7 ildən sonra Tehran və Ər-Riyad arasında münasibətlərin bərpasından sonra ilk dəfə Səudiyyə Ərəbistanına səfər edən İran xarici işlər naziri Abdullahiyanın səfər çərçivəsində həmkarı Feysəl bin Fərhan başda olmaqla Səudiyyə Ərəbistanının yüksək səviyyəli rəsmiləri ilə görüşü gözlənilir.
Abdullahiyanın səfəri zamanı İran və Səudiyyə Ərəbistanı arasında ikitərəfli münasibətlər, regional və qlobal məsələlər müzakirə olunacaq.
Səfərlə eyni vaxtda İranın Ər-Riyaddakı səfiri təyin edilən Əli Rza Enayeti rəsmi olaraq Səudiyyə Ərəbistanında vəzifəsinə başlayacaq.
Seymur Bənnayev
Sitat.info