Biləsuvarda qanunsuz ov edən ərəblər saxlanılıb.
Sitat.info-ya bu barədə Dövlət Ekoloji Təhlükəsizlik Xidmətindən məlumat verilib.
Belə ki, Dövlət Ekoloji Təhlükəsizlik Xidmətinin əməkdaşları tərəfindən keçirilən növbəti nəzarət tədbirləri zamanı Biləsuvar rayonu ərazisində qanunsuz ov edən xarici ölkə vətəndaşları saxlanılıb.
Araşdırma zamanı onların Birləşmiş Ərəb Əmirlikləri vətəndaşları Matar Mohammed Karam Al Mandoos Alblooshi və Obaid Juma Obaid Zayed Alketbi olduğu müəyyən edilib. Faktla bağlı inzibati protokol tərtib edilərək qanun pozucularının hər birinə 2000 manat məbləğində cərimə tətbiq olunub.
Qeyd edək ki, Sitat.info saytında 21 fevral tarixində dərc olunmuş "Ərəblər Biləsuvara ov korteji ilə gəldi! - "Qırmızı Kitab"a düşən quşları ovlayırlar" başlıqlı yazıda, ərəblərin qanunsuz ovu barədə məlumat vermişdik. Ov edən ərəblərin paylaşdıqları videodan da görünürdü ki, çobanların qış otlaqlarında maşınlar şütüyür, şahinləri qırmızı kitab növü olan bəzgəklərin arxasınca uçururlar.
"ECOFRONT" feysbuk qrupunun üzvləri saytımıza bu haqda məlumat vermişdilər. Ekoaktivistlər Biləsuvarda ərəblərin "ov korteji"ni müşahidə edib və baş verənlərlə bağlı video və fotofaktlar da toplamışdılar
Biz məsələni ictimailəşdirdikdən sonra Ekologiya və Təbii Sərvətlər Nazirliyi məsələnin araşdırılmasına başlandığını bildirdi. Nəticə olaraq, Dövlət Ekoloji Təhlükəsizlik Xidmətinin əməkdaşları tərəfindən keçirilən növbəti nəzarət tədbirləri zamanı Biləsuvar rayonu ərazisində qanunsuz ov edən ərəblər saxlanıldı.
Məğrur Salmanov,
Sitat.info
