Ukrayna prezidenti Volodimir Zelenski Rusiyanı Ukraynanın şərqindəki Donbas bölgəsini cəhənnəmə çevirməkdə günahlandırıb. O deyib ki, İşğalçılar Donbasda təzyiqləri artırmağa çalışırlar. Donbas cəhənnəmə çevrilib və bu, mübaliğə deyil.
SİTAT.İNFO xarici mediaya istinadən xəbər verir ki, Ukrayna prezidenti Volodimir Zelenski ictimaiyyət qarşısında çıxışında müharibədəki son vəziyyətə toxunub. Zelenski Rusiya qüvvələrinin ölkənin şərqində Donbas bölgəsini "düzləşdirdiyini" deyib və vurğulayıb ki, Ukraynanın mərkəzində, Odessa vilayətində şəhərlərə davamlı hücumlar edilir. Donbas isə tamamilə məhv edilib.
Zelenski, son həftələrdə Rusiya ordusunun əsas hədəfi olan Donbasla bağlı danışıb və bildirib ki, Ukrayna Silahlı Qüvvələri Xarkov bölgəsinin azad edilməsi üçün əməliyyatlarını davam etdirir: "Bununla belə, Donbasdakı işğalçılar təzyiqi artırmağa çalışır. Bütün bunların Rusiya üçün heç bir hərbi izahı yoxdur".
Zelenski əlavə edib ki, bu Rsiya tərəfindən mümkün olduğu qədər çox Ukraynalını öldürmək üçün qəsdən və vəhşicə bir cəhddir: "Bu, Ukrayna xalqına qarşı soyqırım kimi qələmə veriləcək və işğalçılar mütləq ədalət qarşısında cavab verəcəklər”.
"Ukrayna və demokratiya üçün 40 milyard dollarlıq yeni dəstək paketini təsdiq etdiyi üçün ABŞ-a minnətdaram. Bu gün bu paket ABŞ Senatından keçdi. Bu, güclü liderliyin təzahürüdür və azadlığımızı ümumi müdafiəmizə lazımi töhfədir. Almaniyada maliyyə nazirləri, G7 ölkələrinin Mərkəzi Banklarının rəhbərləri və beynəlxalq donorların nümayəndələri ilə də görüş keçirilib. Mən həmişə səmimi deyirəm. Ukraynada büdcənin aylıq kəsiri hazırda 5 milyard dollardır və bizə tez və adekvat maliyyə dəstəyi lazımdır. Bu, təkcə xərclər və ya tərəfdaşların hədiyyəsi deyil. Bu, onların öz təhlükəsizliyinə töhfəsidir. Çünki Ukraynanın müdafiəsi həm də onları Rusiyanın təhrik edə biləcəyi yeni müharibələrdən və böhranlardan qorumaq deməkdir. Rusiyanın dövlətimizə qarşı təcavüzündə uğur qazanmaması üçün hamı birlikdə çalışmalıdır”, - deyə Zelenski qeyd edib.
Ləman Sərvanqızı
SİTAT.İNFO