Azərbaycan Yüksəliş Partiyası Başqanlıq Heyətinin Türkiyəyə səfəri davam edir. Səfər çərçivəsində Anar Əsədlinin müavinləri YTB-də görüş keçiriblər.
AY Partiya Başqanlıq Heyətinin Türkiyəyə səfəri çərçivəsində növbəti görüş Nazirlər Kabinetinin Xaricdəki Türklər və Əqrəba Toplumlar İdarəsində (YTB) olub.
Başqanlıq Heyətinin üzvləri Aynur Qəzənfərqızı və Vasif İsmayıl YTB Başqanı Abdullah Ərənin müavini Sayit Yusuf ilə görüşüblər.
Görüş zamanı AY Partiya başqanının müavini Aynur Qəzənfərqızı YTB-nin Azərbaycandan olan şəhid və qazi övladlarının ödənişsiz təhsi almalarını təmin etmək təşəbbüsünə görə təşəkkürünü bildirib.
AY Partiya başqanının müavini Vasif İsmayıl isə Sayit Yusufdan bu gözəl təşəbbüsü sadəcə şəhid və qazi övladlarına deyil, onların qardaş-bacılarına da şamil etməyi rica edib. Görüş çox səmərəli keçib.
**************
Bu gün eləcə də, AY Partiya rəhbərliyi Türkiyənin "Ticari həyat" qəzetinə geniş müsahibə verib
Azərbaycan Yüksəliş Partiyası Başqanlıq Heyətinin üzvləri Ankarada “Ticari həyat" qəzetinin redaksiyasını ziyarət ediblər.
Başqanlıq Heyətinin üzvləri Aqil Dadaşzadə, Rəşad Bakuvi, Vasif İsmayıl, Aynur Qəzənfərqızı və Gülşən Hacıyeva qəzetinin təsisçisi Mehmet Göktürklə bir araya gələrək, müxtəlif mövzularda fikir mübadiləsi aparıblar. AY Partiya və “Ticari həyat" qəzetinin yaxın əməkdaşlığı, bu əməkdaşlığın daha da inkişaf etdirilməsi, Türk Dünyası birliyi ilə əlaqədar layihələrin həyata keçirilməsi əsas müzakirə mövzusu olub.
Vasif İsmayıl və Aynur Qəzənfərqızı qəzetə geniş müsahibə veriblər.
*************
AY Partiyanın Başqanlıq Heyəti həmçinin TÜRKSOY-da olub.
Belə ki, Başqanlıq Heyətinin üzvləri Aqil Dadaşzadə, Vasif İsmayıl, Rəşad Bakuvi, Aynur Qəzənfərqızı və Gülşən Hacıyeva mərkəzi ofisi Ankarada yerləşən TÜRKSOY-u ziyarət ediblər.
Orada qurumun Azərbaycan təmsilçisi Elçin Qafarlı ilə görüşən heyət üzvləri AY Partiyanın Türkiyəyə növbəti səfərinin məqsədi barədə məlumat veriblər.
Elçin Qafarlı qurumun Türk Dünyası ilə bağlı həyata keçirdiyi mədəni tədbirlər, nəzərdə tutulan layihələr haqqında danışıb.
AY Partiya Başqanının hədiyyəsi Elçin Qafarlıya təqdim olunub. Eyni zamanda TÜRKSOY-un Azərbaycan təmsilçisi qurumun nəşrlərini partiya rəhbərliyinə hədiyyə edib.
******************
Noyabrın 24-ü həmçinin Ankara Böyük Şəhər Bələdiyyəsinin başqanı Mansur Yavaş AY Partiya Başqanlıq Heyətinin üzvləri Aqil Dadaşzadə, Vasif İsmayıl, Rəşad Bakuvi, Aynur Qəzənfərqızı və Gülşən Hacıyevanı qəbul edib.
Başqan Mansur Yavaş bələdiyyə sahəsində təcrübələrini bölüşüb, görülən tədbirlərdən danışaraq, bələdiyyələrin insanların həyatlarını asanlaşdırmaq, vətəndaşlara xidmət etmək baxımından önəmli qurum olduğunu diqqətə çatdırıb.
Görüşdə AY Partiyanın regional bələdiyyə liderləri yetişdirmə layihəsi üzrə onların Türkiyədə, xüsusilə Ankara Böyük Şəhər Bələdiyyə rəhbərliyinin dəstəyilə təcrübə keçməsi istiqamətində razılıq əldə olunub. Qeyd olunub ki, gənc liderlərin bələdiyyə işini daha mükəmməl öyrənməsi, praktiki vərdişlərini artırmaları baxımından bu təcrübə əhəmiyyətli olacaq.
Sonda AY Partiya Başqanı Anar Əsədlinin hədiyyəsi Mansur Yavaşa təqdim olunub, Mansur Yavaş Başqanlıq Heyətinə hədiyyələr verib, xatirə fotoları çəkdirilib.
Sitat.info
