Xəbər verildiyi kimi, Azərbaycanda ikinci “Ağıllı kənd” Füzuli rayonu Dövlətyarlı kəndində salınacaq. Kəndin təməli ötən il oktyabrın 17-də Prezident cənab İlham Əliyev tərəfindən qoyulub.
Bəs görəsən, Füzuli rayonunun Dövlətyarlı kəndində yeni salınacaq “Ağıllı kənd”də neçə ailə məskunlaşacaq və hansı üstünlükləri olacaq?
Sitat.info xəbər verir ki, bu məsələ ilə bağlı deputat, iqtisadçı alim Vüqar Bayramov məlumat verib. Onun sözlərinə görə, Dövlətyarlı kəndində üç, dörd və beşotaqlı olmaqla, ümumilikdə ilkin mərhələdə 450 evin inşası nəzərdə tutulub. Kənddə məktəb və uşaq bağçası tikiləcək, kəndin mərkəzində meydan salınacaq, bazar inşa ediləcək".
Kənd sakinlərinin məşğulluğu necə təmin olunacağına gəlincə, deputat bildirib ki, kəndin yerləşmə coğrafiyası və təbii üstünlükləri nəzərə alınmaqla bir neçə sektor üzrə müəssisələrin yaradılması nəzərdə tutulub: "Belə ki, kartofçuluq dəyər zənciri üzrə müəssisələrin yaradılması planlaşdırılır. Bu müəssisələrdə 40 daimi, 300-dək mövsümi iş yeri yaradılacaq. Eyni zamanda Köndələnçay su anbarı əsasında ağıllı akvakultura sistemlərinin tətbiqi hesabına balıqçılıq təsərrüfatının qurulması da nəzərdə tutulub. İstehsal olunacaq balıq məhsullarının ixrac ediləcəyi gözlənilir. Kənddə quşçuluq təsərrüfatı da yaradılacaq, ilkin mərhələdə 85 daimi iş yeri olacaq".
V.Bayramovun sözlərinə görə, kəndin iqlimi və relyef üstünlükləri nəzərə alınaraq turizm infrastrukturunun formalaşdırılması və otel infrastrukturunun yaradılması nəzərdə tutulub: "Bütün bunlar ilə yanaşı, kəndin ətrafında isə “Ağıllı kənd” təsərrüfatı sahəsi olacaq. Beləliklə, sakinlərinin kənd təsərrüfatı ilə məşğul olması üçün də imkan yaradılacaq".
Qeyd edək ki, ağıllı kəndin Enerji təminatı yaşıl və alternativ mənbələr hesabına ödəniləcək: "Kənddə xarici investisiya əsasında alternativ enerji həlləri məqsədilə günəş paneli tarlası salınacaq. İnvestisiya layihəsinin gücü 50 meqavat olacaq. Burada 20 daimi iş yeri yaradılacaq.
Məlumata görə, artıq hazırlıq işləri aparılır. Kəndin layihəsi təsdiq olunub. Qısa zamanda inşaat işləri intensivləşəcək.