"Əl-Cəzirə" beynəlxalq televiziyasının müxbiri bu səhər İordan çayının qərb sahilində İsrailin işğal etdiyi Fələstin torpaqlarında İsrail əsgərlərinin açdığı atəş nəticəsində həlak olub. Mərkəzi ofisi Qətərdə yerləşən kanal, İsrail əsgərlərinin Cenin bölgəsində həyata keçirdiyi reyd zamanı müxbir Şirin Əbu Akilin vurulduğunu açıqlayıb.
Fələstin Səhiyyə Nazirliyi də jurnalistin ölümünü təsdiqləyib.
İsrailin "Haaretz" qəzeti yazır ki, Cenindəki qaçqın düşərgəsinə basqın edən ordu birlikləri Şirin Əbu Akili başından vurub, digər jurnalist Ali Asmadi isə kürəyindən yaralanıb. "Haaretz" həmçinin güllələnən jurnalistlərin hər ikisinin üzərində “Press” yazılmış jiletlər olduğunu bildirib. İsrail ordusu isə İordan çayının qərb sahilində əsgərlərlə silahlılar arasında baş verən qarşıdurmada jurnalistlərin vurulmuş ola biləcəyini iddia edib.
Ləman Sərvanqızı
SİTAT.İNFO