"Rusiyanın Ukraynanı işğalı cəhdi, müharibə və dağıntılar Kiyevi müxtəlif gəlirlərdən məhrum edib. Bunlardan biri də təhsil sahəsidir. Dünyanın müxtəlif ölkələrindən hər il on minlərlə gənc Ukraynada təhsil almağa gedirdi. Azərbaycan gənclərinin bir qismi də Türkiyə ilə yanaşı Ukraynada təhsil almağa üstünlük verirdi. Kiyev və Xarkovdakı ali təhsil ocaqlarında müxtəlif millətlərin nümayəndələri təhsil alırdılar.
Ukraynada uzaq Çin və Hindistandan da oxumağa gedənlər az deyildi. Müharibə başladıqda və Xarkov bombardman edilməyə başladıqda tələbələrin böyük qismi çətin vəziyyətə düşdülər. Bir sıra ölkənin lideri Rusiya prezidentinə zəng edərək tələbələrini humanitar koridor vasitəsilə çıxarmaq üçün imkan yaradılmasını xahiş edirdilər. Hindistanın baş naziri Narendra Modi də bu mövzuda Rusiya və Ukrayna prezidentləri ilə telefonda danışaraq hindli tələbələri Xarkovdan çıxarmağa çalışırdı. Müharibəyə qədər Ukraynada 15 min hindli tələbə təhsil alırdı. Onlar müxtəlif humanitar koridorlar vasitəsilə canlarını qurtarmağa çalışırdılar. Xarici tələbələr Ukrayna ilə müxtəlif ölkələrin sərhədlərində ilişib qalmışdılar. Çünki milyonlarla ukraynalı da canlarını qurtarmaq məqsədilə sərhəddə toplaşırlar. Ona görə də xarici ölkələrin tələbələri hamı kimi kilometrlərlə uzanan növbələrə dayanmaq məcburiyyətində idilər".
SİTAT.İNFO xəbər verir ki, bu sözləri politoloq Elxan Şahinoğlu deyib. Onun sözlərinə görə, Kreml Dehliyə kömək etməyə hazır idi: "Hindistan Ukrayna ilə bağlı BMT Təhlükəsizlik Şurasındakı səsvermədə Rusiyanın əleyhinə səs vermədi. Dehli bununla Kremllə münasibətləri gərginləşdirmək istəmədi. Məsələ burasındadır ki, Kəşmir məsələsində də Rusiya hər zaman BMT-də Hindistanın lehinə səs verib. ABŞ-ın məşhur “Financial Times” nəşrinin yazdığına görə, Hindistan Ukrayna məsələsində Çinlə eyni mövqedən çıxış etməklə Rusiyanı özündən uzaqlaşdırmaq istəməyib. Dehlin Kremlin Çinlə Hindistan arasında balansı pozmamasını arzulayır".
Politoloq hesab edir ki, Ukraynanın işğalı və müharibənin davam etməsi Pekin kimi Dehlini də narahat edir: "Ərazi bütövlüyü məsələsi Çin kimi Hindistan üçün də həssas mövzudur. Dehli bir başqa məkanda hər hansı dövlətin ərazi bütövlüyünün parçalanmasında maraqlı deyil. Digər tərəfdən Dehli Kremlin Ukrayna məsələsində qıcıqlandırmaq istəməsə də, siyasi və hərbi əməkdaşlıq məsələlərində ABŞ-a, o cümlədən qonşuları Avstraliya və Yaponiyaya üstünlük verir. Dehli Qərbin Rusiyaya qarşı tətbiq etdiyi sanksiyalarla hesablaşmağa başlayıb. Hindistanın böyük şirkətləri və bankları obyektiv səbəblərdən rusiyalı həmkarlarıyla əməkdaşlıqdan çəkinirlər".