Türkiyədə Novruz bayramına həsr olunmuş Azərbaycan Mədəniyyət Gecəsi keçirildi
Sitat.info xəbər verir ki, 21 mart tarixində Manisa Azərbaycan Mədəniyyət Evi tərəfindən təşkil edilən Novruz bayramına həsr olunmuş Azərbaycan Mədəniyyət Gecəsi , baharın gəlişi və qardaşlıq bağlarının möhkəmliyini əks etdirən möhtəşəm bir tədbir olaraq yadda qaldı. Tədbir Manisa İrfan Məclisində keçirildi və Manisa Böyükşəhər Bələdiyyəsi ilə Yunusemre Bələdiyyəsinin dəstəyi ilə təşkil olundu.
Azərbaycanın tanınmış sənətkarları gecəyə öz rəngini qatdı. Aparıcı, AVAZ Televiziya Muğam müsabiqəsinin rəhbəri Zərifə Çobanzadə , peşəkarlığı ilə iştirakçılardan alqış qazandı. Azərbaycanın Əməkdar artisti Gülüstan Əliyeva , səhnədəki təsirli ifaları ilə tədbiri unudulmaz etdi. Aylin İbrahimova isə zərif səsi ilə qəlbləri oxşadı. Tar ustası Ramin Arzumanlı , nağara ifaçısı Şaiq Bağırov və kamança ustası Rüstəm Hacıyev , sənətləri ilə tədbirə xüsusi ahəng bəxş etdilər.
Tədbir Manisa Azərbaycan Mədəniyyət Evi sədr müavini Yalçın Taşdemir in açılış nitqi ilə başladı. Şəhidlər bir dəqiqəlik sükutla yad edildi. Daha sonra Azərbaycanın və Türkiyənin milli himnləri oxundu.
Seyfəddin Ayakyay , Manisa Azərbaycan Mədəniyyət Evinin sədri olaraq, Novruz bayramının mədəni əhəmiyyətindən, tarixi köklərindən və Azərbaycan-Türkiyə münasibətlərindəki rolundan danışdı. O, tədbirə verdikləri dəstək üçün Manisa Böyükşəhər Bələdiyyəsinə və Yunusemre Bələdiyyəsinə dərin təşəkkürünü ifadə etdi.
Tədbirin sonunda iştirakçılara töhfələrinə görə plaketlər təqdim edildi. Azərbaycanın Media Araşdırmaları və Monitorinq Mərkəzinin sədr müavini Arzu Qocayev , öz dəstəyinə görə xüsusi plaketlə təltif olundu. Qocayev çıxışında təşəkkürlərini bildirərək mərkəzin sədri Zaur Qəriboğlu nun sevgi və salamlarını çatdırdı.
Novruz bayramına həsr olunmuş bu tədbir, iki ölkə arasındakı mədəni və dostluq bağlarını bir daha nümayiş etdirdi. Musiqi və incəsənətlə zənginləşdirilmiş gecə, iştirakçıların yaddaşında xoş xatirələrlə qaldı.
