Türkiyənin İzmir vilayətinin tarixi Birgi kəndi Birləşmiş Millətlər Təşkilatının İnkişaf Proqramı (UNDP) və Türkiyə Turizm və Mədəniyyət Nazirliyinin birgə həyata keçirdiyi SENTRUM (Dayanıqlı Enerjiyə Əsaslanan Turizm Təcrübələri Mərkəzi) layihəsi çərçivəsində yaşıl bir məkana çevriləcək.
SENTRUM Türkiyənin Ayvalık-Küçükköy rayonunda kiçik kəndləri yaşıl məkanlara çevirmək məqsədilə həyata keçirilir. Layihəsinin əsas məqsədi mədəni və təbii dəyərləri qorumaq, enerji səmərəliliyi və bərpa olunan enerji təcrübələri ilə icma əsaslı turizmə əhəmiyyətli töhfə vermək və bu layihənin həyata keçirildiyi hər yerdə beynəlxalq təyinat meyarlarına cavab verməkdir.
2021-ci ildə UNWTO tərəfindən "Ən Yaxşı Kənd Turizm Destinasiyası" mükafatına layiq görülən Birgidə SENTRUM komandaları araşdırma aparacaq, təlimlər keçəcək.
Layihə Birgidə GSTC (Qlobal Davamlı Turizm Şurası) təyinat meyarlarına uyğun gələn təyinat transformasiyasına öncülük edəcək.
Birgi haqqında:
Beş min ildən çox yaşı olan, klassik Səlcuqlu və Osmanlı evlərinin indiyədək qorunub saxlandığı Birgi Dünya Turizm Təşkilatı (UNWTO) tərəfindən "2022-ci ilin ən yaxşı turizm kəndləri" siyahısına daxil edilib. Türkiyənin qərbi Ege bölgəsinin ən məhsuldar hövzələrinin ortasında yerləşən Birgi ağacların kölgəsi olan daşlı küçələri, 12-ci əsrə aid ənənəvi ev və tikililəri özündə əks etdirir. Kənd İzmir vilayətinin Ödəmiş şəhərindən yeddi kilometr aralıdadır.
Birgidə türbələr, mədrəsələr, məscidlər, çeşmələr, hamamlar və kitabxanalar da daxil olmaqla çoxsaylı tarixi tikililər var ki, bunların çoxu Anadolu bəylikləri və Osmanlı dövrünə aiddir. Kənd 1996-cı ildə “mühafizə olunan ərazi” elan edilib. İlk qorunan kənd olmaqla yanaşı, 2012-ci ildə UNESCO-nun Ümumdünya İrs Saytlarının İlkin Siyahısına daxil edilib.