Jurnalist evində güllələnmiş vəziyyətdə tapıldı: Əri saxlanıldı
Sitat.info xəbər verir ki, hadisə noyabrın 8-də baş verib.
Məlumata görə, “92 News” telekanalında çalışan Rabia hadisə zamanı əri, anası və bacısı ilə birlikdə evdə olub. Saat 15:00 radələrində ailə üzvləri yataq otağından silah səsi eşidiblər.
Jurnalistin bacısı otağa daxil olduqda onu yerdə qan içində, ərini isə əlində silahla görüb.
Əhsən Tahir hadisənin təsadüfən baş verdiyini iddia edir. Onun sözlərinə görə, ailə üzvləri özləri və uşaqları üçün qış geyimlərini şkafdan çıxararkən tapança yerə düşüb və qəfil atəş açılıb. O, həyat yoldaşına qəsdən zərər vermədiyini bildirib.
Bununla belə, mərhumun qardaşı Xürrəm Əhməd Tahiri bacısını öldürməkdə ittiham edərək polisə şikayət edib. Bundan sonra hadisə ilə bağlı cinayət işi başlanılıb.
İstintaq zamanı daha bir məqam diqqət çəkib. Belə ki, şübhəli şəxs odlu silaha dair etibarlı lisenziya təqdim edə bilməyib. Polis onun ifadəsini yoxlamaq məqsədilə poliqrafiya testindən keçirməyi də planlaşdırır. Silah və gilizlər məhkəmə-tibbi və ballistik ekspertizaya göndərilib.
Hüquq-mühafizə orqanları hadisənin təsadüfən, yoxsa qəsdən baş verdiyini hələlik müəyyən etməyib.
Arxasında iki azyaşlı qız övladı qaldı
Rabia Ahsan Pakistan tamaşaçıları arasında tanınan teleaparıcılardan biri olub. O, Əhsən Tahirlə təxminən 16 il evli olub. Cütlüyün 13 və 11 yaşlı iki qızı var.
Jurnalistin ölümü Pakistanda geniş ictimai rezonans doğurub. Pakistanın birinci xanımı Asifa Bhutto-Zərdari mərhumun ailəsinə başsağlığı verərək hadisənin hərtərəfli, qərəzsiz və şəffaf araşdırılmasına çağırıb. O, qadınların həyatları üçün qorxmadan yaşamaq və işləmək hüququna malik olduqlarını vurğulayıb.
Hazırda hadisə ilə bağlı istintaq davam edir. Yekun nəticənin məhkəmə-tibbi və ballistik ekspertizaların nəticələrindən sonra açıqlanacağı gözlənilir.
