Avropa Birliyi Rusiyaya və Yaxın Şərqdəki qruplara hərbi tədarük etdiyi üçün İrana qarşı sanksiyaları genişləndirib və Tehrana ticarət məhdudiyyətləri əlavə edib.
Sitat.info xəbər verir ki, bu barədə Brüsseldə iclası keçirilən AB Şurası məlumat yayıb.
“Bu gün Şura Rusiyanın Ukraynaya qarşı işğalçı müharibəsinə, eləcə də Yaxın Şərq və Qırmızı dəniz regionunda silahlı qrup və təşkilatlara İranın hərbi dəstəyi ilə bağlı məhdudlaşdırıcı tədbirlərin əhatə dairəsini genişləndirmək barədə qərar qəbul edib. Bu əlavə tədbir İranın PUA-larının, raketlərinin, əlaqəli texnologiya və komponentlərin ötürülməsi üçün gəmi və limanların istifadəsini hədəfləyir”, - məlumatda deyilib.
Sənəddə vurğulanır ki, qərar raketlərin və PUA-ların hazırlanması və istehsalında istifadə olunan komponentlərin AB-dən İrana ixracına, ötürülməsinə, tədarükünə və ya satışına qadağa qoyur.