Avropa liderləri ABŞ Prezidenti Donald Trampla görüşmək üçün razılaşma mərhələsindədirlər. Bu, Amerika liderinin Ukraynaya ultimativ sülh planı göndərməsi xəbərləri fonunda baş verir.
Sitat.info xəbər verir ki, bu barədə “Sky News” Avropa İttifaqındakı diplomatik mənbələrə istinadla bildirib.
Britaniya Baş naziri Kir Starmer Fransa Prezidenti Emmanuel Makron, Almaniya Kansleri Fridrix Merts və İtaliya Baş naziri Corciya Meloni ilə mümkün səfər imkanını müzakirə edib.
Dörd lider Vaşinqtonda Trampla birgə görüşə hazırlığı öz aralarında koordinasiya edirlər.
“Sky News”un məlumatına görə, Avropa liderlərinin ABŞ-yə səfəri gələn həftənin əvvəlində baş tuta bilər. Görüşün əsas mövzuları Ukrayna məsələsi və ABŞ-nin Avropanın təhlükəsizliyinə yeni yanaşması olacaq.
