“Qarabağın ictimai, təsərrüfat və mədəni həyatında Ağdamın əsrlər boyu özünəməxsus mövqeyi olub” - Deputat
“20 noyabr – Ağdam şəhəri günü Azərbaycanın müasir tarixində xüsusi siyasi, mənəvi və ictimai məzmun daşıyan əlamətdar tarixlərdən biridir. Bu gün xalqımızın tarixi ədalət uğrunda apardığı mübarizənin nəticələrini, dövlətimizin ərazi bütövlüyünün bərpası istiqamətində nümayiş etdirdiyi qətiyyəti və əldə olunmuş Qələbənin yaratdığı inkişaf imkanlarını özündə ehtiva edir”.
Bu fikirləri Sitat.info-ya Ağdam Şəhəri Günü haqqında danışan deputat Rövşən Muradov bildirdi. O vurğuladı ki, Ağdamın azadlığı ilə başlayan yeni mərhələ eyni zamanda milli-mədəni irsin qorunması, məcburi köçkünlərin doğma yurdlarına qayıdışı və bölgənin iqtisadi potensialının yenidən formalaşdırılması baxımından mühüm əhəmiyyət kəsb edir.
“Şəhərin bugünkü inkişafı göstərir ki, Azərbaycanın həyata keçirdiyi bərpa siyasəti tarixi məsuliyyət, sosial rifah və uzunmüddətli iqtisadi tərəqqi prinsiplərinə əsaslanır.
Qarabağın ictimai, təsərrüfat və mədəni həyatında Ağdamın əsrlər boyu özünəməxsus mövqeyi olmuşdur. Şahbulaq qalası, Qarabağ xanlarının İmarət kompleksi, Üzərliktəpə arxeoloji abidəsi bu ərazinin tarixi zənginliyini əks etdirən mühüm nümunələrdir. Ağdamın Azərbaycan musiqi mədəniyyətinə bəxş etdiyi sənətkarlar, burada formalaşmış sənətkarlıq və ticarət ənənələri şəhərin regional əhəmiyyətini daha da artırmışdır. Ağdamın tarixi simasını müəyyənləşdirən başlıca xüsusiyyət onun maddi və mənəvi sərvətlərinin qarşılıqlı təsiri əsasında yaranmış ictimai-mədəni mühitidir”, - deyə o fikirlərinə davam etdi.
Millət vəkili vurğuladı ki, 1993-cü ilin iyulunda Ağdamın Ermənistan silahlı qüvvələri tərəfindən işğal edilməsi bölgənin tarixi inkişafına ağır zərbə vurdu:
“Şəhərin yaşayış infrastrukturu dağıdıldı, iqtisadi potensialı sıradan çıxarıldı, əhali kütləvi şəkildə yurd-yuvasından didərgin salındı. BMT Təhlükəsizlik Şurasının 853 saylı qətnaməsinin tələblərinin yerinə yetirilməməsi beynəlxalq hüquq normalarının icrasında mövcud olan ciddi problemləri üzə çıxardı. Lakin 2020-ci ildə Prezident İlham Əliyevin siyasi rəhbərliyi və Azərbaycan Ordusunun hərbi qüdrəti nəticəsində yaranan yeni reallıq işğalın sona çatmasını təmin etdi. 10 noyabr Bəyanatına uyğun olaraq Ağdamın noyabrın 20-də Azərbaycana qaytarılması dövlətimizin hərbi üstünlüyünün konkret siyasi nəticəsi oldu.
Azadlıqdan sonrakı mərhələdə Ağdama münasibətdə dövlət siyasətinin əsas xüsusiyyəti bərpa işlərinin kompleks idarəetmə prinsipləri üzərində qurulmasıdır. Prezident İlham Əliyevin 2021-ci il mayın 28-də şəhərin yenidən qurulmasının təməl daşını qoyması Ağdamın inkişafında yeni mərhələnin başlanğıcını müəyyənləşdirdi. Dövlət başçısının sonrakı səfərləri zamanı yaşayış məhəllələrinin, sənaye müəssisələrinin, təhsil və səhiyyə obyektlərinin layihələrinin icrasına göstərdiyi diqqət şəhərin sosial-iqtisadi inkişafının dövlət siyasətindəki yerini təsdiqləyir. Ağdamın müasir siması məhz ardıcıl qərarlar və sistemli investisiya proqramları əsasında formalaşdırılır”.
Müsahibimiz nəzərə çatdırdı ki, şəhərin 2040-cı ilədək inkişafını müəyyən edən Baş plan Ağdamın uzunmüddətli perspektivdə Qarabağın mühüm iqtisadi və sosial mərkəzlərindən birinə çevrilməsinə hesablanıb:
“Burada şəhərsalmanın keyfiyyəti yaşayış sahələrinin genişliyi ilə yanaşı, nəqliyyat əlçatanlığı, ictimai məkanların funksionallığı, ekoloji təhlükəsizlik və kommunal xidmətlərin səmərəliliyi ilə ölçülməlidir. Xıdırlı, Kəngərli və Sarıcalı kəndlərində məskunlaşmanın başlanması, digər yaşayış məntəqələrində tikintinin davam etdirilməsi Böyük Qayıdışın coğrafiyasını genişləndirir. Qarşıdakı mühüm vəzifə geri qayıdan ailələrin yerli iqtisadi münasibətlərə inteqrasiyasını və gəlir mənbələrinin davamlılığını təmin etməkdir.
Ağdam Sənaye Parkında istehsal müəssisələrinin fəaliyyətə başlaması, yeni iş yerlərinin yaradılması və Bərdə–Ağdam dəmir yolu əlaqəsinin bərpası şəhərin iqtisadi imkanlarını genişləndirir. Bu infrastrukturun birgə inkişafı kənd təsərrüfatı məhsullarının emalına, sənaye kooperasiyasına, logistika və xidmət sektorunda sahibkarlığın təşviqinə əlverişli şərait yaradır. Ağdamın iqtisadi perspektivi istehsalın şaxələndirilməsi, insan kapitalının gücləndirilməsi və yerli müəssisələrin daha geniş bazarlara çıxışının təmin olunması ilə sıx bağlıdır.
Ağdamın dirçəlişində mədəni irsin qorunması ayrıca əhəmiyyət daşıyır. Cümə məscidinin, İmarət kompleksinin bərpası, Muğam Mərkəzinin istifadəyə verilməsi, müasir mehmanxanaların fəaliyyətə başlaması şəhərin mədəni və turizm həyatına yeni imkanlar qazandırır. Tarixi məkanların elmi əsaslarla qorunması və turizm marşrutlarına inteqrasiyası Ağdamın beynəlxalq tanıdılması baxımından mühüm perspektivlər açır.
Bu gün Ağdamın timsalında Azərbaycan dövlətinin qarşısında duran əsas məqsəd öz tarixi köklərinə bağlı, iqtisadi cəhətdən güclü, yaşayış üçün əlverişli və gələcək nəsillərin inkişafına geniş imkanlar yaradan şəhər mühitini formalaşdırmaqdır. Ağdamın yenidən yüksəlişi Azərbaycanın Zəfərdən sonrakı inkişaf mərhələsinin ən əhəmiyyətli nailiyyətlərindən biri kimi tarixə yazılır”.
Seymur,
Sitat.info