Rusiya-Ukrayna münaqişəsində gərginlik səngimir. Ötən gün Fransa prezidenti Emmanuel Makron ilə Rusiya prezidenti Vladimir Putin arasında keçirilən görüşdə müsbət notlarla bitmədi. Bəs bundan sonrakı mərhələdə nə baş verəcək ? Rusiya hərəkətə keçəcəkmi?
SİTAT,İNFO-ya açıqlamasında bu sualları cavablandıran politoloq, "Atlas" Araşdırmalar Mərkəzinin rəhbəri Elxan Şahinooğlu bildirdi ki, artıq Qərb də Minsk razılaşmasını heçə sayır: "Moskva iddia edir ki, Kiyev Minsk razılaşmalarını yerinə yetirmir. Məgər Donbasdakı insanlara Rusiya pasportları paylamaq Minsk razılaşmalarına uyğun idi? Və ya sərhəddə yüz minlik qoşun cəmləşdirmək, bir o qədərini də Belarusa toplamaq Minsk razılaşmalarına uyğundur? Rusiya prezidenti ona əsəbiləşir ki, vaxtilə Minsk razılaşmalarına dəstək verən Qərb ölkələri hazırda həmin razılaşmalardan faktiki imtina ediblər. Bəli, Minsk razılaşmaları aktuallığını itirib, Kiyev Donbasa xüsusi səlahiyyət verməyəcək, separatçılarla birbaşa danışıqların aparılması da mümkün deyil".
Fransa prezidenti Emmanuel Makronun Moskva və Kiyev səfərlərinə gəldikdə, politoloq vurğuladı kli, müsbət nəticədən danışmaq yersizdir: "Putin Makronla dünənki birgə mətbuat konfransında açıq şəkildə Qərbi və NATO-nu hədələdi, bu gün isə Qara dəniz sahillərində Rusiya hərbi gəmiləri təhlükəli manevrlərə başlayıblar. Putin düyməyə basıb, mexanizm işə düşüb, sadəcə “X gününün” tarixi bəlli deyil".