Türkiyədə ölkəmizə qarşı kampaniya: Sosial mediada qardaşlığa KİMLƏR cəbhə açdı
"Türkiyədə Azərbaycana qarşı son dövrlərdə müşahidə olunan bəzi kampaniyalara münasibətdə ən doğru yanaşma nə bütün Türkiyə cəmiyyətini bu prosesin iştirakçısı kimi təqdim etməkdir, nə də ayrı-ayrı səsləri əhəmiyyətsiz hesab etmək. Burada söhbət daha çox müəyyən siyasi və informasiya dairələrinin Azərbaycanla bağlı qərəzli yanaşmalarından gedir. Bu yanaşmaların Türkiyə-Azərbaycan münasibətlərinin ümumi mənzərəsini müəyyənləşdirdiyini söyləmək doğru olmaz, lakin onların sistemli şəkildə yayılması iki ölkə arasındakı qardaşlıq münasibətlərinə zərər verə biləcək informasiya mühiti formalaşdırır".
Bu sözləri Sitat.info-ya açıqlamasında siyasi şərhçi Tural İsmayılov deyib.
Onun sözlərinə görə, xüsusilə diqqətçəkən məqam ondan ibarətdir ki, bəzi kampaniyalarda Azərbaycanla bağlı tənqid sərhədini aşaraq ölkəmizin dövlətçilik modelinə, milli maraqlarına və Türkiyə ilə münasibətlərinə qarşı şübhə yaratmağa hesablanmış ritorikaya çevrilir: "Tənqid adı altında faktların təhrif edilməsi, kontekstdən çıxarılmış məlumatların sistemli şəkildə yayılması və Azərbaycan-Türkiyə münasibətlərinin mahiyyətinin şübhə altına alınması artıq sadəcə fikir müxtəlifliyi kimi qiymətləndirilə bilməz.
Burada müəyyən dairələrin məqsədini də ehtiyatla qiymətləndirmək lazımdır. Açıq şəkildə konkret məqsəd elan edilmədən kiminsə niyyətini müəyyənləşdirmək doğru deyil. Lakin nəticə etibarilə bu tip kampaniyalar iki ölkənin cəmiyyətləri arasında inamsızlıq yaratmağa, “Türkiyə Azərbaycandan uzaqlaşır” və ya “Azərbaycan Türkiyədən fərqli istiqamət seçir” kimi süni təsəvvürlər formalaşdırmağa xidmət edə bilər. Bu isə həm Türkiyənin, həm də Azərbaycanın regional maraqları baxımından arzuolunmaz nəticədir".
T.İsmayılov hesab edir ki, əslində münasibətlərin real mənzərəsi başqa mənzərə ortaya qoyur: " Şuşa Bəyannaməsi ilə müttəfiqlik səviyyəsinə yüksələn Türkiyə-Azərbaycan əlaqələri enerji, nəqliyyat, müdafiə, iqtisadiyyat və siyasi dialoq daxil olmaqla çoxsaylı istiqamətlərdə inkişaf edir. 2026-cı ilin sentyabrında Prezident Rəcəb Tayyib Ərdoğan və Prezident İlham Əliyevin görüşündə də iki ölkə arasında enerji, infrastruktur və nəqliyyat sahələrində əməkdaşlığın daha da dərinləşdirilməsinin əhəmiyyəti vurğulanıb.
Maraqlıdır ki, Türkiyənin öz rəsmi qurumları da 2026-cı ilin martında Azərbaycan və Türkiyə münasibətlərinə qarşı sosial mediada yayılan bəzi “dezenformasiya və provokasiya” xarakterli paylaşımlara diqqət çəkmişdi. Bu fakt özü göstərir ki, məsələ yalnız Bakının müşahidəsi deyil və Ankara da iki ölkə münasibətlərinə zərər verə biləcək informasiya manipulyasiyalarının fərqindədir.
Azərbaycan və Türkiyə arasında mövcud tarixi, siyasi və strateji bağların mahiyyətini faktlarla göstərmək lazımdır. Çünki müəyyən dairələrin Azərbaycan-Türkiyə münasibətlərinə zidd mövqelərini bütün Türkiyənin mövqeyi kimi təqdim etmək də həmin kampaniyalara xidmət edən yanlış yanaşma olardı.
Bu münasibətlər ayrı-ayrı sosial media kampaniyalarından, gündəlik siyasi polemikalardan və şəxsi ambisiyalardan daha böyükdür. Azərbaycan və Türkiyənin münasibətləri dövlətlərarası sənədlərlə, qarşılıqlı siyasi iradə ilə və iki xalq arasında formalaşmış tarixi bağlarla möhkəmlənib".
Tehran,
Sitat.info
