Rusiya Xarici İşlər Nazirliyinin xüsusi tapşırıqlar üzrə səfiri Rodion Miroşnik iddia edib ki, Ukrayna Prezidenti Volodimir Zelenski İranla bağlı son açıqlamalarından Avropa İttifaqından daha çox maliyyə və hərbi yardım əldə etmək məqsədilə istifadə edir.
Sitat.info xəbər verir ki, TASS-a müsahibəsində danışan Miroşnik bildirib ki, Zelenskinin istənilən hadisəyə münasibəti nəticədə eyni çağırışla yekunlaşır: "Ukraynaya daha çox pul və daha çox silah verin."
Rusiyalı diplomatın sözlərinə görə, Zelenski İranın Ukrayna üçün təhlükə yaratdığı barədə bəyanatları da bu məqsədə xidmət edir və Avropa tərəfdaşlarını Kiyevə əlavə dəstək verməyə inandırmağa yönəlib.
Xatırladaq ki, iyulun 25-də İran Xarici İşlər Nazirliyi Ukraynanı Xəzər dənizində İranın ticarət gəmisinə hücum etməkdə ittiham edib. Hadisə nəticəsində bir iranlı dənizçinin həlak olduğu bildirilib.
İyulun 26-da isə Rusiya Xarici İşlər Nazirliyi açıqlayıb ki, xarici işlər nazirləri Sergey Lavrov və Abbas Əraqçi telefon danışığında həmin insidenti müzakirə ediblər. Məlumata görə, Lavrov həlak olan dənizçinin ailəsinə başsağlığı verib, Əraqçi isə Kiyevin "təhlükəli addımlarının dayandırılmasının vacibliyini" vurğulayıb.
Qeyd edək ki, bu məlumatlar Rusiya rəsmilərinin və TASS agentliyinin açıqlamalarına əsaslanır. Ukrayna tərəfi və ya müstəqil mənbələr bu iddiaları təsdiqləməyib.
Nigar,
Sitat.info