Moskvadan gözlənilməz ittiham
Rusiyanın Təhlükəsizlik Şurasına yaxın ekspert ABŞ-ni Ukraynaya və Avropadakı müttəfiqlərinə xəyanət etməkdə ittiham edib. Onun sözlərinə görə, Vaşinqton Ukrayna müharibəsində öz maraqlarını təmin etdikdən sonra məsuliyyəti Avropanın üzərinə qoyaraq prosesdən çəkilməyə başlayıb.
Sitat.info xəbər verir ki, bu barədə Rusiya Təhlükəsizlik Şurası yanında Ekspert Şurasının üzvü Andrey Suşentsov müsahibəsində bildirib.
Suşentsovun iddiasına görə, ABŞ Ukraynadan Rusiya ilə qarşıdurmada vasitə kimi istifadə edib. Vaşinqton daha sonra böhranla bağlı məqsədlərinin əhəmiyyətli hissəsinə çatdığını hesab edərək diqqətini Şərqi Asiyaya yönəltmək qərarına gəlib.
“ABŞ Ukraynaya dəstək məsuliyyətini Avropa müttəfiqlərinə ötürdü və böhranın təşəbbüskarından onun həllində vasitəçi roluna keçdi. Lakin amerikalılar həm Ukraynaya, həm də avropalı müttəfiqlərinə xəyanət etdilər. Onlar heç bir xəbərdarlıq etmədən bütün yükü Avropanın üzərinə qoydular”, – deyə ekspert bildirib.
Suşentsov Avropa ölkələrinin ABŞ ilə müqayisə oluna biləcək hərbi və texnoloji imkanlara, eləcə də strateji düşüncə potensialına malik olmadığını iddia edib.
O, Ukraynadakı müharibənin son mərhələyə daxil olduğunu da iddia edib.
“Müharibə yaxın aylarda da, yaxın illərdə də başa çata bilər. Amma söhbət on il davam edəcək müharibədən getmir”, – deyə Suşentsov vurğulayıb.
Ekspertin sözlərinə görə, Rusiya qarşı tərəfin resurslarını tükəndirməyə hesablanmış uzunmüddətli müharibə strategiyası həyata keçirir.
Nəşr xatırladır ki, Kremlə yaxın dairələr əvvəllər də Vaşinqtonu Ukraynaya xəyanətdə ittiham ediblər. Lakin həmin ittihamlar əsasən Co Bayden administrasiyasına yönəlmişdi.
Belə ki, 2025-ci ilin martında Rusiya Xarici İşlər Nazirliyinin sözçüsü Mariya Zaxarova Baydeni, Viktoriya Nulandı və Entoni Blinkeni Ukraynanı aldatmaqda və ona xəyanət etməkdə günahlandırmışdı.
Donald Trampın Ağ Evə qayıdışından sonra isə Kremlin ABŞ administrasiyasına münasibətdə ritorikası nəzərəçarpacaq dərəcədə yumşalıb.
Bu baxımdan Rusiya Təhlükəsizlik Şurası yanında fəaliyyət göstərən ekspertin indi ABŞ-ni açıq şəkildə xəyanətdə ittiham etməsi Moskvanın Vaşinqtona münasibətində diqqətçəkən ritorik dəyişiklik kimi qiymətləndirilə bilər. Bununla belə, Suşentsovun açıqlaması Kremlin rəsmi mövqeyinin dəyişdiyini təsdiqləmir.
