Tarixi abidələrimiz qorunmalıdır. Amma hər gün mediada və sosial şəbəkələrdə tarixi abidələrimizin baxımsızlıqdan məhv olduğuna dair məlumatlar paylaşılır. Azərbaycanın ən qədim yaşayış məskənlərindən biri olan Qəbələdə də tarixi abidələrin bir çoxu baxımsızlıqdan məhv olur və yaxud məmurların biganəliyindən yaşı yüzillərlə ölçülən tarixi abidələr zibilliyə çevrilir.
Qəbələnin Həzrə kəndi də tarixi abidələrin məskənidir. Kənddə yerli əhalinin Övliya türbələri adlandırdığı, XIV əsrə aid müqəddəs hesab edilən şeyx Bədrəddin və şeyx Mənsur türbələri var. Kəndin adı həmin türbələrlə bağlıdır. Ərəb dilində həzr “ocaq, pir” deməkdir.
Orta əsrlərə aid qədim qəbiristanlıq arxeoloji abidəsi, Şeyx Bədrəddin (1446), Şeyx Məhəmməd (XV əsr), Şeyx Mənsur (XVI) türbələri memarlıq abidələri, şimalda Həzrə dağında Dördkünc formalı bürcdən ibarət, kirəc məhlulu ilə daşdan hörülmüş müdafiə qülləsi ərazinin qədimliyindən xəbər verir. Yerli əhali arasında “Qalayeri” kimi tanınan bu qüllə IX-XI əsrlərdə Qəbələ feodal hakimliyinin şərq sərhədlərini qorumaq üçün nəzarət məntəqəsi rolunu oynayır.
Amma bu abidələr baxımsızlıqdan məhv olur.
Həyacan təbilini isə Qəbələyə səfər edən ictimai fəal Ramil Əliyev qaldırıb. İctimai fəal bildirib ki, tarixi abidələri qorumağa borclu olan Mədəniyyət Nazirliyi nədənsə bu abidələri görmür.
“Tarixi abidələr millətin tarixini, keçmişini əks etdirir.Orada babalarımızın ruhu gəzir. Millətin qan yaddaşıdır bu abidələr. Onları qorumaq və gələcək nəsillərə çatdırmaq hamımızın müqəddəs işimiz olmalıdır. Hər dəfə bir rayona gedəndə uçurulmuş, dağıdılmış tarixi abidələri görəndə qəlbim qan ağlayır. Qəbələdə belə tarixi abidələr tamamilə dağıdılır. Bəzi abidələr isə gözdən – könüldən uzaq olduğöu üçün baxımsızlıqdan darmadağın olur. Mədəniyyət Nazirliyi bu abidələrin üzərinə qorunması ilə bağlı lövhə vursa da, burada abidələrin baxımsızlığı göz önündədir. Bu abidələr millətin namus məsələsidir.” -deyə Ramil Əliyev bildirib.
İctimai fəal qeyd edib ki, tarixi abidələr baxımsızlıqdan tamamilə məhv olub.
“Bu məsələdə abidələrə cavabdeh qurumların böyük günahı var. Bu abidələri qorumalı olan Mədəniyyət Nazirliyinin səlahiyyətləri yəqin ki, bu abidələrə baxmaq üçün yox, burada kabab yemək üçün gəlirlər. Çünki abidələrin baxımsızlığı və dağıdılması göz önündədir. Təsəvvür edin ki, bir insan babalarından, nənələrindən qalan bir qiymətli əşyanı göz babəyi kimi qoruyur. Amma bu sevgini onun tarixi abidəyə münasibətində görmürük. Bəli, dağıdılır, tari-mar edilir abidlərimiz. İldən-ilə dünya əhəmiyyətli, ölkə əhəmiyyətli, regional əhəmiyyətli tarixi abidələrimiz yoxa çıxır.” -deyə Ramil Əliyev bildirib.
