"Əsgər evindən 50 km aralıda xidmət edir, şənbə - bazarı öz evində keçirir" - İqtisadçı qonşu ölkədəki əsgəri sistemdən DANIŞDI
"Gürcüstanda bir neçə il əvvəl Türkiyənin birbaşa iştirakı, məsləhətləri ilə ordu sistemi yenidən qurulmağa başlandı. Türkiyəli mütəxəssislər NATO proqramları çərçivəsində qonşu, dost Gürcüstanda yeni qaydalar tədbiq etməyə başladılar.
Beləliklə, Gürcüstanda çağırış yaşı 18-27 yaş arası müəyyənləşib və vətəndaşa seçim imkanı verilib, xidməti ertələmək rüşvətsiz, pulsuz, adi müraciətlə mümkündür, yəni, vətəndaş çağırış zamanı yazılı müraciət edə bilər ki, bu il yox, məsələn, gələn il xidmətə gedəcək, bununla bağlı öhdəlik götürür".
Bu sözləri Sitat.info-ya açıqlamasında Real Partiyasının sədri Natiq Cəfərli deyib.
Onun sözlərinə görə, qonşu ölkədə xidmət 3 yerə bölünüb və vətəndaş özü seçə bilər: "1) Döyüş hazırlığı bölmələrində - cəmi 6 ay xidmət, 2) Başqa nazirlik və qurumlarda (DİN, Fövqaladə hallar və s.) – 8 ay xidmət 3) Hansısa sahədə mütəxəssis, və ya, kiçik rütbəli komandirlər – 12 ay xidmət.
Hər bir əsgər ödənişlə təmin edilir: 6 ay xidmət edənlər ayda 530 lari (195 dollar), 8 ay xidmət edənlər 600 lari (220 dollar), 12 ay xidmət edənlər 1275–1530 lari (470–560 dollar).
Əgər vətəndaş könüllü olaraq əsgərlik üçün müraciət edirsə, ödənişləri 30% artırılır".
N.Cəfərlinin sözlərinə görə, Gürcüstanda daha bir maraqlı yenilik – bütün əsgərlər öz evlərindən 50 km aralı xidmət edirlər: "Əsgərlər həftədə 5 gün xidmət edirlər, şənbə-bazar isə öz evlərinə gedə bilərlər. Əsgərlərin xidmətdən kənar zamanlarında mobil telefon və internetdən istifadələri tam sərbəstdir. Şənbə-bazar evə getməyənlər qaldıqları hissədə idmanla məşğul ola, yemək yeyə, internetdə zaman keçirə bilərlər. Bundan başqa hər bir əsgərin 10 günlük məzuniyyət haqqı da var.
Əsgər gedən hər bir vətəndaşın iş yeri onun üçün saxlanılır, işlədiyi orqan, müəssə, qurum, firma ona ayrıca bonus da verir. Əsgərlər 4-8 nəfərlik “hostel” tipli yerlərdə qalırlar, yeməklərini ancaq tenderi udan kənar şirkətlər verir, yemək “isveç stolu” stilində təqdim olunur. Gürcüstan bu sistemə torpaqları işğal altında olduğu dövrdə belə keçib, 20% ərazisinini Rusiya işğal edib. Torpaqlarını qaytarmış, ərazi bütövlüyünü və suverenliyini tam bərpa edən Azərbaycanda Ordu islahatlarını daha rahat eləmək olar, bəzi islahatlar da olub, amma, onları dərinləşdirmək, Orduya ayrılan xərcləri azaldaraq, daha texnoloji və vətəndaşa rahat xidmət sisteminə keçməliyik.
Çağırış sistemi elə Gürcüstana bənzər ola bilər, əsgərin öz evənə yaxın qulluq etməsi, müəyyən vəsait alması və bir çox başqa məsələlər həllini tapmalıdır. Bizim Qəhraman Ordumuz artıq Türkiyə (NATO) standartlarını mənimsəyib, amma, məişəti, əsgərə münasibət hələ də sovetdən qalıb".
Nigar,
Sitat.info
