"Hamının səlahiyyəti var, amma heç kim məsuliyyət daşımaq istəmir" - Natiq Cəfərli Bakıdakı tıxacdan yazdı
"Bakıda taxac probleminin fundamental həll edilməsi lazımdır, kosmetik tədbirlər heç nəyi dəyişməyəcək – ictimai nəqliyyat əlçatan olmalıdır, tez və konfortlu xidmət göstərməlidir, Bakının yükü azaldılmalıdır, yol infrastruktutu yaxşılaşdırılmalıdır, ümumiyyətlə, seçkili Bakı Böyük Şəhər Bələdiyyəsi və şəhər hökuməti formalaşdırılmalıdır ki, səlahiyyət və məsuliyyətin eyni ünvanı olsun. Bu gün Bakı pərakəndə idarə edilir, hamının səlahiyyəti var – amma, heç kim məsuliyyət daşımaq istəmir".
Sitat.info xəbər verir ki, bu sözləri iqtisadçı ekspert, Real Partiyasının sədri Natiq Cəfərli deyib.
O bildirib ki, iş saatları ilə bağlı dəyişiklik bütün müəssisələrdə eyni dəqiqliklə icra olunmayacaq: "İndi də təklif edilir ki, Bakıda çevik iş saatları tədbiq edilsin – ilk baxışdan məntiqli görünsə də, işlək olması çətindir. Əvvəla, bunu ancaq dövlət-büdcə təşkilatlarında etmək olar – özəl sektora bunu əmr etmək mümkün və doğru deyil. İri özəl banklarda, holdinqlərdə mümkün ola bilər, amma, siz kiçik dükan, kafe, restoranlarda əmrlə bunu edə bilməzsiniz.
Gələk indi məsələnin doğura biləcəyi problemlərə, işləyən valideynlər məktəblər saat 8 də başladığı üçün uşaqlarını məktəbə qoyub, sonra işə gedirlər. Yaxşı, məsələn, valideynə dedilər ki, iş saat 07:00-də başlayacaq, ya da, 10:00-da. O zaman nə etsin? Ölkədə “SchoolBus” sistemi yoxdur ki, uşaqlar məktəbə gedib-gələ bilsinlər, və ya heç də həmişə evə yaxın yerdə məktəblərdə yer tapmaq olmur. O zaman valideyn nə etsin?!
Yəni, iş qrafiki məsələsini həssas və nöqtəli təyin etmək lazım gələcək və bu da tıxac və ictimai nəqliyyatdakı sıxlıq problemini aradan qaldıran amil olmayacaq. Xülasə, bizdə “məktəbbas” (məktəbli avtobusu) yoxdur, amma, “basabas” həmişə var".
Nigar,
Sitat.info
