Bakıya gələcək erməni əsilli nazir kimdir? - DOSYE
Fələstinin erməni əsilli xarici işlər və diaspor naziri Varsen Aqabekyan Şahinin Azərbaycana səfəri gözlənilir.
O, oktyabrın 15-də Bakıda keçiriləcək Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşündə Fələstini təmsil edəcək.
Sitat.info xatırladır ki, Bakıya ilk dəfə səfər edəcək Varsen Aqabekyan Şahin erməni əsilli Fələstin siyasətçisi və akademikdir. O, 1958-ci ildə İordaniyanın paytaxtı Əmmanda anadan olub. ABŞ-da ali təhsil alan Aqabekyan Şahin İndiana Universiteti-Purdue Universitetində magistr dərəcəsi alıb, 1988-ci ildə isə Pittsburq Universitetində təhsil siyasəti və idarəetmə istiqaməti üzrə doktorluq dərəcəsinə yiyələnib.
O, uzun illər akademik sahədə fəaliyyət göstərib. 1988-2008-ci illərdə Qüds Universitetində çalışıb, 1995-1998-ci illərdə Səhiyyə Peşələri fakültəsinin, 1998-2000-ci illərdə isə Magistratura təhsili fakültəsinin dekanı olub. Bununla yanaşı, Fələstində səhiyyə insan resurslarının inkişafı, təhsil, institusional quruculuq və mədəniyyət layihələrində müxtəlif rəhbər vəzifələr tutub.
Aqabekyan Şahin 2016-2018-ci illərdə Fələstinin Müstəqil İnsan Hüquqları Komissiyasının baş komissarı vəzifəsində çalışıb. O, həmçinin Fələstində kilsələrin fəaliyyəti və tarixi dini abidələrin bərpası ilə bağlı prezident komitələrinin işində iştirak edib, qadın hüquqları və insan hüquqları məsələləri üzrə fəaliyyət göstərib.
O, 2024-cü il martın 31-də Fələstin hökumətində xarici işlər və diaspor məsələləri üzrə dövlət naziri vəzifəsinə başlayıb. 2025-ci il iyunun 23-də isə prezident Mahmud Abbasın qərarı ilə Fələstinin xarici işlər və diaspor naziri təyin olunub. Bu təyinatla Aqabekyan Şahin ölkənin diplomatik qurumuna rəhbərlik edən ilk qadın olub.
Qeyd edək ki, AQEM-in VII Zirvə Görüşü oktyabrın 15-də Bakıda keçiriləcək. Tədbirdə təşkilata üzv ölkələrin və digər tərəfdaş dövlətlərin yüksək səviyyəli nümayəndələrinin iştirakı gözlənilir.
