Rusiya Maliyyə Nazirliyi ölkənin neft və təbii qaz gəlirlərində noyabr ayında ciddi azalma olduğunu açıqlayıb.
Sitat.info xəbər verir ki, nazirliyin məlumatına görə, enerji gəlirləri ötən ilin eyni dövrü ilə müqayisədə 33,8% azalaraq 531 milyard rubl səviyyəsinə düşüb. Azalma təxminən 6,9 milyard dollara yaxındır. Bildirilib ki, yanvar–noyabr 2025 dövründə ümumi neft və qaz gəlirləri də əvvəlki illə müqayisədə 21,4% azalaraq 8 trilyon 29 milyard rubl olub. Beləliklə, enerji sektorundan əldə olunan gəlirlərdə ilboyu davam edən azalma tendensiyası noyabrda da güclənib.
Nazirlik noyabr ayında planlaşdırılandan daha çox gəlir itkisi yaşandığını vurğulayıb. Ötən ay neft və təbii qaz gəlirləri oktyabr ayı ilə müqayisədə 40,2% azalıb, bu isə diqqətçəkən aylıq daralma deməkdir.
Mütəxəssislər bildirir ki, gəlirlərdəki azalmanın əsas səbəblərindən biri enerji şirkətlərinə tətbiq edilən yeni vergi öhdəlikləridir. Artan vergi təzyiqinin istehsalçıların gəlirlərini aşağı saldığı deyilir.
Qərb ölkələrinin Rusiya neft və qazına qarşı tətbiq etdiyi geniş sanksiyalar davam edərkən, Moskva da ixrac bazarlarını şaxələndirmək səylərini gücləndirir. Rusiya xüsusilə Asiya ölkələri başda olmaqla yeni enerji alıcıları ilə ticarət həcmini artırmağı hədəfləyir.
Tehran,
Sitat.info