"Moskva vilayətində bu ilin mart ayında yüzlərlə insanın ölümünə səbəb olan "Crocus City Hall"da baş vermiş terror aktından sonra İŞİD terrorçu təşkilatının imkanları araşdırılmağa başlanılıb. Terror aktına görə məsuliyyəti “Vilayət Xorasan” üzərinə götürsə də, bu terrorçu təşkilatın İŞİD-lə bağlılığı xəbərləri yayıldı. Bundan sonra yayılan xəbərdə Türkiyənin xüsusi xidmət orqanlarının rusiyalı həmkarlarını xəbərdarlıq etdiyi və terrorçuların Moskvada "Crocus City Hall" ticarət mərkəzinə hücumdan sonra ikinci terror aktını planlaşdırdıqlarını müəyyənləşdirdilər. Növbəti terror aktının qarşısı alındı. Qarşısı alınan terror planları göstərir ki, terrorçu təşkilatlar fəallıqlarını artırıblar".
Bu sözləri Sitat.info-ya açıqlamasında politoloq, Atlas Araşdırmalar Mərkəzinin rəhbəri Elxan Şahinoğlu deyib.
O bildirib ki, bu arada, Əl-Qaida terrorçu təşkilatının da fəallaşmağa başladığı barədə xəbərlərin sayı artıb: "Bəzi ekspertlər bu terrorçu təşkilatın Əfqanıstan və Pakistan ərazisində fəaliyyətinin azaldığı bildirilsələr də, Qərb mətbuatında Əl-Qaida üzvlərinin fəallaşmağa meylli olduğu barədə müxtəlif yazılar dərc olunub. Görünür, Əl-Qaida İŞİD və ya “Vilayəti Xorasan”ın “gerisində” qalmaq istəmir. Amerikalı hərbçilər Əl-Qaida lideri Üsamə bin Ladeni Pakistanın Abddotabad şəhərində öldürdükdən sonra Pentaqon və Mərkəzi Kəşfiyyat İdarəsi Pakistanda və Əfqanıstanda təşkilatın digər üzvlərini də neytrallaşdırmağa çalışırdı. Terrorçular liderlərinin ölümündən sonra fəaliyyətlərini dondursalar, yatmış hücrələrin yenidən üzə çıxacaqları təhlükəsi var".
E.Şahinoğlu vurğulayıb ki, Taliban Əfqanıstanın tamamına nəzarət edə bilmədiyinə görə, bundan Əl-Qaida istifadə etməyə çalışır: " Birləşmiş Millətlər Təşkilatının yaydığı son hesabata görə, Əl-Qaidanın Qəndəhar əyalətində fəallaşdığı, digər əyalətlərdə isə düşərgələr yaratmağa çalışdığı bildirilib. Terrorçu təşkilatların fəallaşmasına müxtəlif ərazilərdəki lokal və genişmiqyaslı müharibələr də şərait yaradır. Beynəlxalq aləmin diqqəti Rusiya-Ukrayna müharibəsinə, İsrailin Qəzzada hərbi əməliyyatına yönələrkən terrorçular yatmış hücrələrdən çıxmağa çalışırlar".
Nərgiz,
Sitat.info