"Şuşa bəyannaməsindən sonra Azərbaycan-Türkiyə hərbi müttəfiqliyi imkan verir ki, Azərbaycan hərbi quruculuğunu yeni müstəviyə qaldırsın və ordumuzun Rusiya tərəfindən yerləşdirilən kadrlardan təmizləsin".
Bu sözləri SİTAT.İNFO-ya açıqlamasında Azərbaycan Demokrat Partiyasının sədri Sərdar Cəlaloğlu "Tərtər işi" ilə bağlı həbsləri dəyərləndirərkən deyib.
Onun sözlərinə görə, indiki halda Tərtər hadisələri ordunun bu cür şəxslərdən təmizlənməsi üçün bir fürsətdir: "Prezident İlham Əliyev də bəyan etdi ki, biz Türkiyə modelində ordu quruculuğuna keçirik. Bu istiqamətdə işlər görüldükcə, orduda xalqımızın , dövlətimizin əleyhinə olan qüvvələr də təmizlənəcək".
Partiya sədri onu da vurğuladı ki, ordu üzərində şəffaflıq təmin edilməlidir: "Sovet hökuməti dövründə belə ordu üzərində ictimai nəzarət mexanizmləri var idi. İndiki halda da ordu üzərində ictimai nəzarət təmin edilməli və mümkün qədər ordu xalqın nəzarəti altında olmalıdır".
Nərgiz,
SİTAT.İNFO