Bakıda xadimə iş adamının evinin yataq otağındakı əl çantasından böyük məbləğdə pulu hissə-hissə oğurlayıb.
Sitat.info xəbər verir ki, qadın iş adamının Səbail rayonunda yerləşən ikimərtəbəli evində xadimə işləyib. O, 2021-ci ilin aprel ayının əvvəllərindən başlayaraq 1 fevral 2022-ci il tarixə qədər evdə 500 manat əməkhaqqı ilə çalışıb.
İş adamı öz biznesindən qazandığı pulları 50-100-lük dollar və avro şəklində müxtəlif məbləğdə tünd göy rəngli əl çantasına qoyaraq yataq otağında çarpayının yanında saxlayıb. Qadın evində təmizlik işlərini apararkən çarpayının yanında əl çantanın içərisində sayını bilmədiyi çox sayda 100-lük ABŞ dolları və avro pul əsginaslarını görüb, maddi vəziyyəti aşağı və Şəki rayonunda yaşayan oğlu Toğrulun xəstəliyi ilə bağlı pula ehtiyacı olduğundan hər 15-20 gündən bir çantadan 2-3 ədəd əsginas götürüb.
Ev sahibi 7 dekabr 2021-ci ildə çantada olan dollar zərfini açdıqda içərisində 10 000 dollar olmalı olduğu halda, cəmi 5400 dollar olduğunu görüb. O, bununla bağlı həyat yoldaşından soruşub. Lakin xanımı pulu götürmədiyini deyib.
2022-ci ilin yanvar ayı ərzində o, zərfdə olan pulun yenə azalmasını müəyyən edib. Pandemiya dövrü olduğundan evinə qohum-əqrəbadan və ya tanışlarından heç kimin gəlib-getmədiyi, kənardan müdaxilə olunmadığı və evdə yad adamın yalnız Yeganə olduğu üçün ondan şübhələnməyə başlayıb.
25 yanvar 2022-ci ildə iş adamı xadimənin evə gələcəyini bildiyi üçün əl çantasındakı zərfin içərisinə 900 dollar qoyub. Qadın evi təmizləyib getdikdən sonra zərfin içərisində 800 dollar qaldığını görərək, oğurluğun onun tərəfindən edildiyinə əmin olub.
Bundan sonra iş adamı onun etdiyi oğurluğu sübuta yetirmək üçün 26 yanvar 2022-ci ildə həmin zərfə əlavə olaraq 2 000 dollar qoyub ki, zərfin içərisində pul çox olsun. İlham həmin pulların fotosunu çəkib ki, əsginasların seriya nömrələri şəklə düşsün.
Bundan sonra hər gün zərfdə olan pulun miqdarı Yeganə evdən getmədən həyat yoldaşı Aytən tərəfindən yoxlanıb. Nəhayət, 1 fevral 2022-ci il tarixdə Yeganə yenə evə gəlib. Evin xanımı paltar ütülətmək bəhanəsi ilə onu ləngidərək, çantanın içərisindəki pulu sayıb. Məlum olub ki, puldan 200 dollar götürülüb. Dərhal bu barədə ərinə məlumat verib.
İş adamı oğurluqla bağlı Səbail Rayon Polis İdarəsinin 9-cu Polis Bölməsinə müraciət edib və polis əməkdaşları ilə birlikdə evə gəlib. Qadın polislərlə söhbətində oğurluğu etiraf edib və həmin günü götürdüyü 200 dolları verib.
Səbail Rayon Məhkəməsinin hakimi Azər Tağıyevin sədrliyi ilə keçirilən prosesdə təqsirləndirilən şəxs Cinayət Məcəlləsinin 177.2.4-cü maddəsi ilə ittiham olunaraq 2 il müddətinə azadlıqdan məhrum edilib.
//Manset.az