"Rusiyanın Ukraynaya təcavüzünün Moskva tərəfindən açıqlanan rəsmi səbəblərindən ən vacibiləri nələrdir? Kreml deyirdi ki, NATO genişlənir, sərhədlərimizə yaxınlaşır, Ukraynada da NATO üzvü olsa, orada hərbi infrastruktur qursa bizə təhdiddir, oradaki “ultra-millətçilik” məhv edilməlidir. İlk baxışdan məntiqli görünsə də, çürük və mənasız “arqumentdir”.
SİTAT.İNFO xəbər verir ki, bu fikirləri iqtisadçı ekspert Natiq Cəfərli deyib.
O fikrini faktlarla belə izah edib: "NATO artıq çoxdandır ki, Rusiya sərhəddindədir, hətta SSRİ sərhədində idi. ABŞ Uzaq Şərqdə SSRİ-nin sərhədində idi, Türkiyə Qara dənizdə SSRİ-nin sərhədində idi, Norveç 1949-dan NATO üzvü olub və SSRİ ilə sərhədi var. SSRİ-dən dağılandan sonra Baltikyanı ölkələr Rusiya sərhəddindədir. Yəni, Rusiyanın, “NATO təşkilatı indi bizim sərhədimizə dirənmək istəyir”, tezisi gülüncdür. İkincisi NATO ölkələri Ukrayna müharibəsində bu ölkə üzərində hava məkanını bağlamadılar, çünki, NATO Rusiya ilə birbaşa hərbi toqquşma istəmir, bundan çəkinir. Niyə istəmir? Çünki, bu nüvə müharibəsi demək, dünyanın sonu olardı".
Ekspertin sözlərinə görə, NATO anlayır ki, Rusiyaya hücum etmək, bu ölkə ilə açıq savaşmaq olmaz: "Qərb bilir ki, ümumiyyətlə, nüvə silahı olan Rusiya ilə müharibə mümkün deyil . Yaxşı, belədirsə Rusiya nədən çəkinir, nə fərqi var NATO hardadır?! Fərqi nədir ki, hansı ölkə NATO üzvü olur, ya yox, zatən Rusiyanın təhlükəsizliyinə zəmanət onun əlində olan yüzlərlə nüvə silahıdır, atom bombalarıdır. Deməli, bu “arqument” mənasızdır".
N.Cəfərli onu da əlavə etdi ki, Rusiyanın daha bir tezisi Ukraynada “ultra-millətçilər” hakimiyyətdə olmasıdır, onlar İkinci Dünya Müharibəsində nasist Almaniyasına dəstək olanların tezislərini təkrarlayır, onların salamlaşmasından (Slava Ukraine) istifadə edir: "Bu arqument də ilk baxışdan haqlı görünsə də, mənasız yanaşmadı. Bütün ölkələrdə “ultra-millətçi” qruplar var, hətta Rusiyada da var, Baltikyani olkələrdə, Polşada, Almaniyada, Fransada – yəni, hər yerdə var. Əsas odur ki, bu qruplar qərarverici olmasınlar, çünki “ultra-millətçilər” insan haqq və azadlıqlarına təhdid təşkil edə biləcək tezislər səsləndirirlər. Amma, Ukraynda prezident yəhudidir, nazirlər, deputatlar və qərarverənlər arasında etnik olaraq gürcülər, yahudilər, azərbaycanlılar, ermənilər, hətta ruslar da var – bunun harası “ultra-millətçilikdir”?! Bundan başqa, Rusiyanın Avropada ən böyük dostları, maddi və hər cür dəstək alan siyasi partiyalar və siyasətçilər kimlərdir?! Bəli, “ultra-millətçilər”, məsələn, Fransada Marine Le Pen, Macarıstanda Urban və s.. Yaxşı, bunu hara yazaq?! Və ya, əgər Ukraynada camaatı bombalamağa, dinc insanları qətl etməyi, şəhərləri xaraba qoymağı “ultra-millətçiliyi” ləğv etməklə “əsaslandırmağa” çalışmalarını bu gün dünya “həzm” etsə, göz yumsa, sabah o bəhanə ilə Baltikyani ölkələrinə, Cənubi Qafqaza soxulsa nə olacaq?! Əgər “Slava Ukraine” sözünü o zaman “ultra-millətçilər” istifadə ediblərsə, bu sözdən nədən indi imtina etmək lazımdır?! Axı mənası “Ukraynaya Eşq olsun”, deməkdir, bunun nəyi pisdir, nə alt mənası var ki?! Bu gün Kreml təbliğatçılarının səsləndirdiyi fikirlər absurddur, məntiqsizdir, öz imperialist, şovinist siyasətlərini “mədəni və geosiyasi” dona bürümək cəhdidir...".