"Rusiyanın Ukraynaya təcavüzü, işğal cəhdi, Ukrayna torpaqlarını özünə birləşdirməklə bağlı addımları, bütün sivil dünyanın Kremlə qarşı bu günkü tutumu bizim üçün əla, unikal şans yaradıb. Rusiyanın təcavüzü “millətlərin öz müqəddəratını təyin etmək” kimi mücərrəd tezisi tam çürüdüb. Bu tezis, belə yanaşma işğala, separatizmə qapı açmaq, haqq qazandırmaq üçün Moskvanının əlində alətə çevrilib. Artıq sivil dünya bunu anladı, nə qədər təhlükəli yanaşma olduğunu gördü".
Bu fikirləri Sitat.info-ya açıqlamasında iqtisadçı ekspert Natiq Cəfərli deyib.
Onun sözlərinə görə, Azərbaycanın dövlət siyasəti, özünüifadə etmək üsulları indiki reallığı nəzərə almaqla qurulmalıdır: " Reallıq isə budur ki, sivil dünyanın iki əsas düşməni – Rusiya və İran Ermənistanın yanındadır, Xankəndi və ətrafında yaşayan erməni əsilli azərbaycanlıların dinc yaşamasına, Azərbaycana inteqrasiya olmasına mane olan Moskva və Tehranın bölgə ilə bağlı siyasətidir. Xankəndi və ətrafı Rusiyanın işğalı altındadır, bölgədə qeyri-sabitliyin olmasında, gərginliyin artmasında Kreml birbaşa maraqlıdır, Vardanyan isə bu siyasəti həyata keçirmək üçün Moskvanın təyin etdiyi canişindir – vəssalam, bu tezisləri bir neçə dildə dünyaya çatdırmaq üçün çalışmaq lazımdır".
N.Cəfərli vurğuladı ki, Xankəndi və ətrafında yaşayan erməni əsilli azərbaycanlıların davranışını demokratiyaya, insan haqq və azadlıqlarına bağlamaq cəhdlərinə gəldikdə isə bu fiksiyadır, bizim bəzi “ağıllılar” da bu tora düşürlər: "Ermənilər 30 illik davası demokratiya, insan haqları davası deyil, torpaq qoparmaq, işğal etmək davranışıdır. Separatizm mərəzi demokratiya ilə “sağalmır” və bu anlayışa bağlı da deyil – Kataloniya separatçıları demokratik İspaniyada yaşayırlar və ya, Gürcüstan daha demokratik ölkədir, amma Abxaziya, C.Osetiya məsələsini demokratiya ilə çözə bilmədi, ya da Moldova demokratikdir, amma nədənsə demokratik yolla qondarma “Dnestyanı respublikasını” geri qaytara bilmir. Bir daha: Separatizm xəstəliyi demokratiya uğrunda mücadilə deyil, bu tələyə düşmək olmaz. Bizim məmləkətə demokratiya, haqq və azadlıqlar, ədalətli sistem Xankəndində yaşayan erməni əsilli vətəndaşlarımıza görə deyil də, hamımıza görə lazımdır, ölkəmizin rifahının yüksəlməsi, tərəqqi üçün vacibdir..".
Nərgiz,
Sitat.info