Rusiya-Ukrayna müharibəsinin davam etdiyi Ukraynanın Donetsk vilayətində cəbhə xəttində pilotsuz uçuş aparatları (PUA) aktiv şəkildə istifadə olunur.
Sitat.info xəbər verir ki, Ukrayna boyu ən qızğın qarşıdurmaların yaşandığı Donetsk vilayətində yerləşdirilən Ukrayna ordusunun müxtəlif bölmələrinə məxsus PUA-ların döyüş fəaliyyəti 24 saat davam edir.
Xüsusilə son vaxtlar Donetsk cəbhə xəttində hücumlarını artıran Rusiya ordusunun qüvvələrini dəf etməyə çalışan Ukrayna ordusunda PUA-ların istifadəsinə böyük önəm verilir.
İki ordunun birlikləri arasında döyüş təyyarələri, vertolyotlar, çoxsaylı reaktiv yaylım atəşi sistemləri, tanklar və digər zirehli texnika və artilleriya sistemləri kimi ağır silahlardan istifadə edildiyi, PUA-lardan da geniş şəkildə istifadə edildiyi görülür.
Ukrayna ordusunun bölgənin müxtəlif cəbhə nöqtələrində dislokasiya olunmuş bəzi briqadaları düşmənin mövqelərinə hücum və kəşfiyyat üçün müxtəlif PUA-lardan istifadə edir.
Cəbhədə hər cür kəşfiyyat və müşahidə missiyasını yerinə yetirə bilən PUA-larla yanaşı, “Kamikazze” tipli PUA-lar da fəaliyyət göstərir.
Seymur Bənnayev
Sitat.info