Türkiyə, Rusiya və Ukrayna XİN başçılarının görüşü başa çatıb - YENİLƏNİB + FOTO/VİDEO

Türkiyə, Rusiya və Ukrayna xarici işlər nazirlərinin üçtərəfli görüşü başa çatıb. 

Oxu.Az xəbər verir ki, Mövlud Çavuşoğlu, Sergey Lavrov və Dmitro Kuleba arasında gedən müzakirələr bir saat davam edib. 

Qeyd edək ki, bir qədər sonra Sergey Lavrov və Dmitro Kuleba ayrı-ayrılıqda mətbuat konfransı keçirəcəklər. 

12:36

Türkiyə, Rusiya və Ukrayna xarici işlər nazirləri Mövlud Çavuşoğlu, Sergey Lavrov və Dmitro Kulebanın üçtərəfli görüşü başlayıb.

Oxu.Az xəbər verir ki, Antalya şəhərinin Belek rayonundakı “Regnum Carya” hotelində baş tutan görüşdən sonra mətbuat konfransı keçiriləcək.

11:19

Antalyada Türkiyənin xarici işlər naziri Mövlud Çavuşoğlu və rusiyalı həmkarı Sergey Lavrov arasında görüş olub.

Oxu.Az xəbər verir ki, bu barədə Rusiyanın Xarici İşlər Nazirliyi məlumat yayıb.

10:58

Bu gün Antalya şəhərində baş tutacaq Türkiyə-Ukrayna-Rusiya XİN rəhbərlərinin görüşü çərçivəsində Türkiyənin xarici işlər naziri Mövlud Çavuşoğlu ukraynalı həmkarı Dmitro Kuleba ilə ikitərəfli görüş keçirib. 

Oxu.az xəbər verir ki, bu barədə Türkiyənin xarici işlər naziri Mövlud Çavuşoğlu özünün şəxsi “Facebook” hesabında məlumat verib.

10:52

Rusiya-Ukrayna müharibəsi davam edərkən Türkiyə kritik görüşə ev sahibliyi edəcək.

Bu gün Rusiyanın xarici işlər naziri Sergey Lavrov və Ukraynanın xarici işlər naziri Dmitro Kuleba Diplomatiya Forumu çərçivəsində Antalyada görüşəcəklər.

Bu, hər iki ölkənin XİN rəhbərlərinin müharibə başlayandan bəri ilk görüşü olacaq.

Görüşdən sonra Kuleba mətbuat konfransında jurnalistlərin suallarını cavablandıracaq.

Türkiyə xarici işlər naziri Mövlud Çavuşoğlunun iştirakı ilə üçtərəfli formatda sülh danışıqları Türkiyə vaxtı ilə saat 11.00-da (Bakı vaxtı ilə saat 12.00) keçiriləcək.

Rusiya və Ukrayna nümayəndə heyətləri bu iclasdan kənar görüşməyəcək və ayrı-ayrı hotellərdə qalacaqlar.